噚日同大家分析過已進行過嘅五十六場賽事結果及盤路，今日會以另一個角度作出發點，睇吓八強球隊喺今屆賽事一啲盤路表現數據，搵出邊隊至係捧場客嘅「靈丹」或者「毒藥」。
亞洲盤方面，目前嘅八強球隊之中，只有一隊塞內加爾仍然未被打破「盤路」嘅不敗身，其餘都曾經輸過盤。迄今四場比賽，以平注長追塞內加爾的話，已經有三倍回報，成績冠絕其餘七隊。
至於球迷眾多，相信亦獲得過最多飛數支持嘅英格蘭，到目前為止成績只係兩贏兩輸，玩咁耐都係得個桔！睇嚟以呢個勢頭，喺八強賽塞內加爾對土耳其時，可以再追多一口塞內加爾，況且初盤暫時見到都係平手，值得各位博早飛。
另外，要數全個決賽周三十二隊中，至今擁有最佳回報率嘅球隊，其實係已出局嘅愛爾蘭，盤路四戰四勝，重犀利過塞內加爾。
再睇吓八強球隊嘅半/全場表現，德國、英格蘭、土耳其三隊都係未嘗於半場時落後對手嘅球隊，前兩者更未輸過全場賽事，若要「煲」佢哋半/全場，大可飛走半場輸波及全場輸波共五瓣選擇，每場只選佢哋「贏/贏」、「贏/和」、「和/贏」、「和/和」四瓣已經足夠。
不過呢啲都係分頭較熱嘅選擇，想博冷就應該吼塞內加爾及南韓，兩隊波嘅半/全場盤路都好「爛」，爛得嚟又少有「贏/贏」呢啲熱門賽果，策略係向半場及全場戰果不一樣嘅盤落手，例如「和/贏」、「輸/和」呢類，以及唔好追上一場開出嘅相同結果。
文：華度