美股大幅反彈，港股噚日朝只係虛火上升，其後差不多打回原形，如果唔係大摩出口術調高滙豐（005）投資評級，相信大市要倒跌收場。恒指收報10852，升19點，成交69.92億元。
藍籌股全面偏軟，惟獨滙豐支撐大市，升1.5％，收90.50元，成交高達12.2億元。大戶好似托住滙豐出貨兼沽期指，後市仍未度過盈富（2800）危險期。
香港富泰（121）早前藉出售上海陸家嘴物業，套現逾2.8億元而炒高，公司現時仍在廣州、上海及天津持有投資物業項目，但公司在國內房地產嘅投資又唔算好進取，冇咩特別賣點，但有投資者憧憬公司將會賣殼，估計係向第三者收購資產，然後向對方大量發行新股，出讓公司控制權，變相賣殼。
不過，公司就話冇收購資產與賣殼事項正在商討。此股噚日再升22%，收0.129元，不過成交只有86.26萬元。Cookie話此股主要係炒派送，由於公司投資策略唔進取，所以有人以為公司會派特別股息。
第一電訊（8110）噚日停牌，市場傳公司擬配售1.6億股新股，定價每股0.76元，集資1.22億元，配售價較停牌前收市價0.88元大幅折讓13%。
近期市況唔好，公司能否成功配股真係話唔埋，若能成功配股，可以話係反映市場對公司股份有需求，若果停牌配唔成股，咁就真係大鑊，好似日東科技（365）復牌話俾人知配唔成股，復牌後狂跌25.24％，重衰過俾人斬倉，所以傳出配股嘅股份要小心。
阿虎