美股大反彈，港股最高升152點，去到尾幾乎打回原形，只有20點進帳，令人失望。有啲股票可能已見底，例如聯通（762），企定喺6.85元，減價賣手機消息不利，但股價已先作反映，𠵱家個價重低過911嗰陣（7.05元）。
大市短期超賣，若然定得住，聯通睇多陣，若然又係定得住嘅話，不妨細細注諗吓啲聯通Call輪博反彈。主角例牌係9094同9035。9094喺11月初到期，現價11仙，溢價5.8%，槓桿率6.2倍。9035喺11月尾到期，現價8.8仙，溢價6.3%，槓桿率7.8倍。兩件輪條件差唔多，交投亦係。
3隻大型電訊股中，中移動（941）唯一微跌，早段做過23.95元，埋單仍低1格，收23.55元。走勢反覆，炒中移動Call輪要靈活，低買高賣，鎖定對象9044，現價17仙，吼住16仙買入，19仙以上散水。
電盈（008）似已見底，收1.90元，冇升跌。
電盈熱門Call輪9111跌1.6%。9132則跌夠11.3%，最高15.4仙，收12.5仙，高低波幅有23%。有5個幾月玩，博反彈，揀9132。
章盛