王秀琳（Mango）第一次拍電影，就係同馮德倫、張家輝合作拍喜劇《賭俠2002地獄黑仔王》，其他演員重包括盧淑儀、羅蘭、黃一飛同埋姜皓文等人。
Mango、張家輝同埋黃一飛等人日前喺西沙海灘開工，Mango話雖然自己係第一次拍戲，但好快就已經適應，台前幕後工作人員對佢好好。唔使埋位嘅時候，Mango會熟讀劇本，絕對冇偷懶。Mango重話呢排自己積極減肥，希望夏天以最佳狀態見人。
日前拍嘅戲份，劇情講話張家輝因為加入黑社會靠賭為生，佢女友Mango見男友變成咁好勞氣，所以提出分手。拍攝當日因為天氣好熱，所以張家輝頻頻飲水、補妝，而黃一飛又以少林弟子嘅造型見人，赤膊打功夫，好搞笑。
蘇永康因為涉嫌藏有同埋服食搖頭丸呢單嘢，搞到好大件事，前日康仔返咗香港，佢同傳媒講話應該都唔會出街，發生咗啲咁嘅事，康仔匿埋都係人之常情。而呢排適逢世界盃，個個都想放多幾日假睇波，但係蘇永康就偏偏唔鍾意睇足球，喺屋企都冇乜嘢好做，又真係幾慘嘅。
佘詩曼（阿佘）出道至今，佢嘅星途都好順暢，當中不排除阿佘喺演戲上盡咗好大嘅努力。不過坊間亦有傳伊人嗲功好勁，全憑呢招上位。馮仁昭雖然唔太清楚阿佘嘅嗲功係咪普通人都應付到，不過，就八到阿佘得閒最鍾意透過手提電話同異性友人發放訊息，當中有溫柔嘅問候，咁啲異性友人又點會唔冧。
陳淑蘭（蘭子）早前公開話自己嘅身材平平，佢重用「豉油碟」嚟形容自己，認真貼切又抵死。蘭子自貶身價，不但冇對佢造成影響，重得到美容纖體公司嘅青睞。蘭子噚日同馮仁昭講，佢近排得到兩間美容纖體公司斟介，佢話最希望可以豐胸，至於同邊間做代言人，佢話睇吓邊間條件好先決定。
韓劇《藍色生死戀2》喺亞視嘅收視麻麻，但喺台灣就好受歡迎，張信哲所唱嘅國語版主題曲，就喺台灣唱到家喻戶曉。張信哲唱到呢隻歌可以話係機緣巧合，事緣佢嘅唱片公司總監今年三月去韓國，當時韓國播緊呢套劇，總監聽後就好鍾意套劇嘅主題曲，於是即刻同韓國唱片公司傾版權，然後畀張信哲主唱。
趙薇𠵱家喺台灣拍緊電影《綠茶》，佢喺戲入面日頭做學生，夜晚就喺酒店彈琴。佢晚晚六點開工，拍到凌晨先至收工，但日頭佢又要追睇世界盃，所以成日唔夠瞓，好在套戲啱啱拍完，唔使再捱眼瞓。趙薇七月會嚟香港，幫纖體公司做宣傳。
容祖兒（Joey）將會聯同古箏名家郭慧詩，下個月十三號喺中環大會堂合作表演一場。到時郭慧詩會負責彈古箏，以配合Joey喺台上嘅唱歌演出，而Joey到時重會演唱佢多首首本名曲。呢個嶄新組合，對於Joey嘅歌迷嚟講，又真係幾有新意噃！