美股周一晚雖大幅反彈，但港股噚日高開的升勢亦僅曇花一現，沽盤全日均採取主動，結果行情又轉至低收，恒指最高11983，曾升過150點，但低收10852，僅進帳19點，成交約70億元，期指平水。
大市連跌5日，一有反彈，好多人都趁高減持。官股推成80億貨，有排消化，對大市影響，呢幾日市場亦已經清清楚楚反映出嚟。投資者信心動搖，後市易跌難升。
噚日靠銀行股支撐大局，電訊同地產股都乏善足陳。滙豐（005）重上90元關口，收90.5元，升1.25元，恒生（011）亦有一個位進帳。滙豐轉強，主要係所羅門美邦看好其前景，另外大摩亦將其評級由「中性」調升到「增持」。所羅門同時看好的大新金融（440）亦有好表現，高收38.0元，升1.2元。不過，所羅門則看淡本港整體市場的表現，認為港股未來半年最多只有5%至10%的升幅。
二三線股個別發展，但下跌股仍比上升股多出1倍，市場之弱，可以得見。前日話新醫藥（8085）會有大動作，噚日股價即見有異動，早段已搶上1.22元，收1.20元，升8仙，短線仍可以止賺位繼續持有。
另外生命科技（1180）在跌穿0.3元時已止蝕，結果低位0.265元，有消息指生科食過翻尋味，有意再做多一次「披成」，暫時不宜沾手。
佑威國際（627）前日係威係勢，噚日又走晒樣，由於大市前景欠明朗，故在其跌穿50日線（0.76元）時已暫時止賺，待其跌勢喘定後才再考慮。
筆者相信佑威的跌勢只屬短暫，中長線仍可看好，今次未能在0.85元（由高位0.95元回落10%）止賺，已違背了原則，賺少好多。在股市打滾，要自保，就一定要嚴守紀律，買入股票唔對路，跌10%就要止蝕，買入後股價上升，就可將止賺位上移，或到超買時獲利回吐，賺取最大利潤。
郭兆誠