八方怕搭飛機，原因之一因為飛機餐太難食，試過捱肚餓坐十幾粒鐘，想話食碗即食麫都冇；呢種慘況，希望隨國泰新猷而改變。
話說近年來，各大航空公司都努力搶客，開始用地道食品作招徠，好似國泰航空，佢哋最近就度到條新橋，為飛去北美嘅頭等艙乘客提供煲仔飯。呢個新服務對大部份食唔慣飛機餐嘅乘客無疑是一個喜訊。
八方問國泰中人，喺飛機上點煲飯，原來佢地今次出煲仔飯係經過周詳安排，由於成個瓦煲連飯煮，要成個鐘，國泰最後決定先喺地面用傳統方法煮好煲飯，之後用錫紙包好，急凍至攝氏四度送上機，要食嘅時候就加熱，再放番入瓦煲仔入面上菜。呢個套餐重有個明火例湯，今個月率先提供豉汁肉粒煲仔飯同雪耳雞湯，下個月就有北菇雞飯同冬瓜湯。
國泰中人又話，要視乎反應先至考慮將煲仔飯推廣至其他航線及商務客位。
咁經濟位呢？使唔使咁孤寒呢陳南祿董事，你反正唔去為人民服務，係咪應該諗諗佢，為更多國泰顧客着想呢？
傳真︰2623-9278
電郵︰