特區政府一場高官問責制將會有唔少高官升職加薪，但平日幫呢班高官向傳媒解畫嘅新聞官就似乎冇乜得益。難怪八方啲老友大吐苦水，滿腹怨氣啦。
喺新制度之下，問責局長可以帶一位新聞秘書加入政府。聽講現時已四出搵人，人工同總新聞主任（CIO）一樣。咁講法，如果𠵱家已經做緊CIO，又咁幸運俾未來的問責局長睇中，只會「平調」，人工梗係冇得加，但係工作量就多好多嘞。
八方老友話，你估咁易做問責官員咩，未來局長一方面要落區做騷同政黨爭票，分分鐘連老公、老婆、仔女都要捧埋出嚟。萬一有局長唔生性，俾傳媒捉到痛腳，又或者多一個好似阿松咁嘅人，坦蕩蕩公開愛情生活，新聞官到時就唔得掂，公事未忙完，又要照顧埋老闆嘅私生活，咁咪即係變相減薪！
老友重特別替梁愛詩未來嘅新聞秘書抱不平，因為三司之中，阿煲呔同阿松嘅新聞秘書都係首長級第二級政務官，比律政司嘅總新聞主任高級好多，唔通詩姐嘅公關易搞好多？
傳真︰2623-9278
電郵︰