今屆無乜人睇好嘅德國滾吓滾吓入咗八強，形勢大好；原來除咗因為佢哋發揮得好之外，背後重有間電腦公司幫手做技術分析。所以話，足球同高科技嘅關係真係愈嚟愈密切。
據講，有間德國細公司最近透過翻看球賽影帶同電腦分析，將德國對手嘅踢法同戰術作出詳細報告，重會喺賽前將呢啲資料送去德國陣營。德國龍門簡尼就大讚呢啲資料有用，如果唔係睇過啲料，上場波可能已俾巴拉圭捷拉華射入罰球咁話喎。
德國佬不嬲都玩高科技，足球意識又夠先進，今次將科技同足球結合得咁好；與此同時，同打入八強嘅塞內加爾踢出真正逍遙奔放嘅快樂足球，作為球迷嘅你，究竟喜歡邊隊波嘅風格呢？
日本隊噚日俾土耳其淘汰後，我求大俠相信賽會𠵱家肯定頭痛，擔心由土耳其對塞內加爾嘅八強賽無乜人睇。今屆賽事平均入座率已經唔算高，如果到時得一萬幾千人睇，場面冷清，到時都咪話唔肉酸。
意大利教練查柏東尼喺噚晚對南韓嘅上半場，表現得好躁。大概喺四十分鐘左右，唔知佢係咪唔滿意球證判決，突然一腳踢向地上嘅水壺，差啲省中後備席上嘅尼斯達同另一位球員。計我求大俠話，佢老人家咁肉緊，咪盞搞到啲球員重緊張，結果球隊輸波，都咪話唔關佢事。
塞內加爾教練麥素埋怨賽會喺每場比賽前畀得太少時間佢哋熱身，熱身四十五分鐘後又要返更衣室等二十分鐘，搞到球員熱完身好似無熱過咁。計我求驗客話，其實當今任何大賽都要時間準備奏國歌同清場，只好怨塞內加爾少大賽經驗，要習慣吓囉。
費高同南韓球員求饒單嘢有新進展，主角李榮杓出嚟同費高道歉，話佢理解錯咗費高嘅手勢。之但係，啲傳媒就一於好少理，繼續煲呢單新聞；一時話南韓安貞煥都聽到費高同李榮杓求饒，一時又話其實係南韓同葡萄牙求和至真。既然國際足協𠵱家都未有行動，大家都係聽住先啦！
「萬人迷」碧咸到時到後都會轉吓髮型，最近盛傳佢已經叫佢私人髮型師飛去日本，準備對巴西前幫佢搞個新形象，不過碧咸噚日已經否認會咁做。講真，嚟緊對巴西場波咁緊要，重邊得閒玩形象吖，碧咸唔會喺呢個時候唔識顧全大局啩。