未開波先興奮，日本人一向多花臣，其出品的W盃（日本人對世界盃之稱）產品亦精美得意冠絕歷屆，而其引發的波衫熱同樣以型仔行頭，捧場打氣抑或行街睇戲，後生仔着波衫都要講Fashion。日本國家隊佔盡主場之利，如有神助更歷史性晉身16強（雖然入唔到八強），W盃熱潮在日本隊每次勝仗後都升級，今次就直擊東京街頭，睇睇今期街頭大熱的W盃Look。
記者、攝影：梁珮瑜
在新宿站遇上的騎呢打氣男，絕對要頒個冠軍Look畀佢。身穿貼身國旗忍者衫，手持膠袋兼孭背囊，當記者要求拍照時，佢更擺出各款騎呢姿勢，不斷拍手大叫：「日本！日本！日本……」投入與搞笑程度足以成為W盃Look之冠。
日本街頭當然以穿日本國家隊球衣最多，但男生主打着藍色主場波衫，女生就會以襯色為理由，會着其他球隊波衫，多數唔係為打氣而係要趕潮流。
各大潮流或娛樂雜誌，每期都有W盃波衫出現，明星Models齊穿球衣捧世界盃熱，加上日本隊愈戰愈勇，熱潮洶湧真係唔睇波都要襯番個打波Look。
趁着W盃的熱潮，各類有關產品乘勢推出，但日本街頭所見，都係國家隊JFA產品至多至受歡迎，其中當然又以波衫最搶手，人人有件。