世界盃今明兩日暫時休戰，二十一號開始八強半準決賽。由開波至今，雖然話警察掃賭，但到處聽到賭波之聲，而且賭注唔細㖭，睇嚟政府禁賭條例，收唔到大效果，以後都唔知點收科，譬如話二○○四年歐洲盃，眨吓眼就到，賭波實在係禁之不絕。
莫講話非法外圍，英國啲合法莊家睇怕今年都贏咗好多錢。大熱門阿根廷、法國第一輪出局，次熱門葡萄牙亦玩完，莊家不費吹灰之力，就殺晒落呢三個國家嘅注碼，賺到笑嘞啩。行街鄭係藍色兵團（阿根廷、法國、意大利）擁躉，唔係幾順氣，懷疑有冇打假波。左丁山就話冇，理由好簡單，如果啲大牌球星打假波，輸咗就側側膊閃開啦，使乜大字咁撻在球場上，喊到唔收得聲，返到更衣室鴉雀無聲，慘過弔喪？我就唔信巴迪斯圖達、華朗、施丹、費高等天皇巨星，能夠做戲做得咁似？佢哋人人值幾千萬美元身價，收買佢哋全部？嘩，要幾多代價先至得？
其實所有大牌球星，一年到晚踢到筋疲力倦，好少時間休息，踢世界盃就力不從心。初賽表現好，速度最快嘅球隊如南韓、日本，球員之中冇乜超級巨星，就係一個環境證據。如果要遷就歐洲球星，世界盃起碼要到六月二十號先至好舉行，等佢哋有時間自歐洲聯賽完結後，回吓氣養吓傷，否則皇家馬德里奪得歐洲冠軍盃，施丹、費高變成病貓嘅話，世界盃就冇咁好睇嘞！