世界盃賽事巴西前晚大戰比利時，適逢陳奕迅、谷祖琳及應采兒主演的新片《幽靈人間Ⅱ之鬼味人間》首映，故場面出奇地冷清，只得幾位主角撐場，其中谷祖琳更以歐洲粗腿女鬼Look示人。
陳奕迅、谷祖琳及應采兒前晚齊到會展出席新片《幽靈人間Ⅱ之鬼味人間》首映，當晚正值世界盃巴西與比利時對壘的賽事，首映除了三位主角外，圈中人只有二人組合Shine、李蘢怡及關心妍捧場，比起一向電影首映禮賓客如雲的情況，場面可謂十分冷清。
陳奕迅（Eason）說：「我以前喺英國讀書，所以睇英國波，有情意結呀，巴西對英格蘭就會睇。」前日Eason好友霆鋒上庭，他表示未與對方聯絡，還問記者霆鋒現時情況如何，Eason說：「希望佢雨過天青，唔好嘅嘢快啲過。」
至於難得捧場的Shine則說：「我哋嚟支持師姐谷祖琳，因為我哋係同一間經理人公司嘛。我哋係英國隊擁躉，唔鍾意巴西波，佢哋好囂張。」Shine成員徐天佑更謂早前巴西隊球員拒絕與中國隊球員交換球衣，令他覺得巴西隊很小器。
而獲師弟捧場的谷祖琳，前晚一身摩登歐洲女鬼打扮亮相，露出一雙看來相當粗壯的玉腿，她說：「我喺套戲度成日着小鳳仙裝，咪扮下其他鬼囉，本來我想做金髮女鬼，但整咗出嚟好似SM咁，咪換囉。」另一女主角應采兒則以露臍小背心襯圖案裙上陣，與李嘉欣同日生日的她明天將度過十九歲生日，應采兒說：「嗰日出世嘅人都係靚女嘛，我到時要開工拍新片《我左眼見鬼》，要喺片場過呀，希望有人送部車畀我啦，我想要Jeep。」
採訪：何永寧
攝影：陳偉權