陳曉東的新碟《從未忘記》，首批推出不久即告斷市，唱片公司加印新貨時隨碟附送「幸運占卜火柴」，但唱片舖恐防違反消防條例，要求退貨，唱片公司只好以換領券取代火柴贈品，東東亦叫歌迷玩火柴時要小心。
陳曉東（東東）新碟《從未忘記》內有一首由他親自作曲的新歌《劃火柴》，該曲亦是其新劇《百分百感覺》的主題曲，唱片公司為配合宣傳，印製了一批兩款的「幸運占卜火柴」，起初只送予電台DJ，但因反應極好，不少歌迷紛紛致電唱片公司打聽如何可取得火柴，亦有人將火柴炒賣，故唱片公司便斥資六位數，多印製一批兩款的火柴隨碟附送。
誰知唱片舖以擔心附有火柴的唱片放在貨倉內會觸犯消防條例，易生危險為由，要唱片公司將火柴禮物拆掉再賣，並隨即將整批唱片退回。東東在電話中說：「其實送火柴係諗住畀歌迷玩吓高興吓，我自己都有玩占卜火柴，好得意㗎。不過玩之餘，重點梗係放喺聽歌度啦，同埋話晒劃火柴要點火，記得要喺空曠地方，小心啲玩。」
而東東所屬環球唱片總經理黃建豪對此說：「其實火柴又唔係違禁品，亦冇觸犯防火條例，只係唱片舖擔心咁多火柴擺埋一齊好危險啫，卒之咪攞番啲貨番嚟拆晒佢再包番囉，唔計本來送火柴嘅六位數字，啲貨要送番嚟又拆又包過，火柴又要再獨立包裝，嗰度都額外使多好多錢㗎，𠵱家會喺啲碟度加張coupon（換領券），歌迷可以去指定地點換火柴。」
採訪、攝影：楊潔雯