韓戰地手記:世盃場過大苦煞記者

韓戰地手記:世盃場過大苦煞記者

到過幾個南韓世界盃比賽球場,所處位置雖然都係公共交通工具容易到達,但每次從球場外圍行到新聞中心或者球場內,都唔係一件易事,因為球場實在太大。

外形設計夠科幻
為咗主辦好世界盃,南韓大部份比賽球場都係全新興建,而且南韓同日本一樣,都係着重電子科技發展嘅國家,球場外形設計都係以巨型同科幻為主;正如亞洲足協秘書長韋立本曾經講過,唔少世界盃球場外形設計都屬於未來世界設計,其實,小記有時都覺得比賽球場真係唔屬於呢個世界。

路牌指示欠清晰
點解?某些球場可以容納觀眾人數只係四萬多人,但係球場外圍實在太大,有時由球場入口行到新聞中心,加埋保安檢查,要成十五分鐘;最慘就係球場指示牌唔多清楚,明明行左邊會快啲,偏偏路牌指示就要行右邊,結果要兜咗個大圈,浪費球迷氣力同時間。其實,好多外國記者都投訴球場咁大,點解無穿梭巴士;若果中國有機會辦世界盃決賽周,希望唔好起到啲球場過大,兼顧實際需要就好嘞。