股海實戰錄:和黃試底要睇實

股海實戰錄:和黃試底要睇實

美股承接上周五尾市反彈之勢,周一杜指大升213點,收9687。若以上周五低位9260計,杜指回升427點,納指亦由上周五低位反彈超過7%,用過山車走勢嚟形容,其實並無誇張。港股可能係大形勢仍利淡,加上美股近期對港股影響力漸降,恒指噚日高開低收,最後僅升19點。
銀行股噚日支撐大市,滙豐(005)連跌3日後,大摩出嚟調高滙豐投資評級,連睇淡港股前景嘅所羅門亦睇好滙豐,股價回升1.25元,收90.50元。不過,近期南美洲金融市場似有暗湧,淡友要搵藉口質滙豐較以往易好多。

滙豐向上阻力大
圖表上,滙豐暫受制於上周五下跌裂口91.25至92.25元,就算可以補回裂口,仍受制於回落中嘅10日線(現處92.80元),以及50日線(現處93.25元)。滙豐彈完之後,回頭下試88元機會相當大,到時如果守得穩,可以小敲滙豐Call輪博反彈。
另一隻值得留意係和黃(013),噚日低位62.25元,再創今年新低,雖然走勢仍向淡,但已超賣,加上未大幅跌破63元,有機會以雙底回升,可能係最先完成調整嘅大藍籌,但如果確認破位,先沽後補肯定有着數。
趙飛雲