日東科技（365）批股唔成，噚日復牌，結果跌到一仆一碌，全日跌咗25.24％，收77仙。睇落跌幅相當嚇人，但成交其實唔算好多。
不過，小初就覺得事件好古怪，背後炒家冇理由批股尚未成功之際，就將股價推低，件事似乎好迷離。
小初走去問經紀陳，佢話日東原本搵C記經紀行幫手，但結果因為市況問題，批貨去唔晒，雙方講唔掂數決定拉倒，日東曾經再搵K記經紀行幫手，但結果又係講唔掂數而告吹。
按常理推論，如果公司想搵機會繼續批股，應該頂住股價再等時機，冇理由任股價急跌成咁。
市場傳聞隻股在停牌之際，有人無端端得到一手平貨，佢諗住其他人攞咗批貨後，睇怕都係要嚟掟居多，橫掂都係咁，不如自己先沽貨走人，質低股價，等要咗貨嘅炒家投降，然後喺低位再收番，所以出現日東急跌嘅事件。
慕容小初