信不信由你，噚日韓、意一戰嘅一等門券喺賽前一天曾由原本嘅港幣一千五百蚊炒至一萬三千蚊。後來組委會喺開賽前向外推出一千四百張門票，門外炒價雖有下跌，但仍要四千三百蚊一張，而且幫襯嘅人仍唔少呢！
近排有親南韓波，市內各處嘅大螢幕都會有人滿之患，人數夾埋多到數以十萬計。噚日漢城光化門嘅大螢幕就聚集咗十萬名球迷。最開心嘅當然係附近賣嘢食、飲品嘅檔攤。聽佢哋講生意額足足比平時多咗三成，唔開心就有鬼囉。
光化門附近嘅樂天漢堡包店，為咗睇直播嘅球迷可以隨時醫肚，由原定九點嘅收舖時間延長至晚上十二時。話就話為人民服務，其實都係為賺錢。剩係以汽水計，平時一日賣二百杯，噚日就賣咗五百杯。
相信噚日睇「韓意」賽睇得最肉緊嘅莫過於南韓國家隊前教練車範根，皆因佢個仔仔車斗利喺噚日比賽中曾喺對方龍門前表演一記倒掛，當時車範根正同南韓嘅文化廣播電視台做呢場波嘅評述，見到個仔咁威，佢即時反應係喺座位彈起身，完全忘記自己講緊場波。 本報記者梁國威、李勇明南韓直擊