早排發展商猛話樓市好，有意勾地，但周一政府就踢爆話冇收過勾地申請，有發展商解釋，因為市場有唔少優質項目推出，好似地鐵、九鐵同市建局嘅項目，分散咗注意力。假如情況屬實，即係兩鐵一局同政府爭客，市場有咁多供應，政府有乜辦法堅持不賤賣土地呢？
中原尖沙嘴海防道分行噚日開幕，位置人流量極高，蘭西初時以為一定係好貴租，但聽講呢個500方呎舖位月租只係6萬，呎租120蚊，一啲都唔算貴。打探之下先知個舖係舖王波叔用友情價租畀中記。從早排中記工商部分行開幕，能請到波叔等重量級人馬出席，就知雙方關係好好啦。
一手盤近年雖然主導樓市，但仍有不少二手短炒個案，當中唔少重係高齡樓添，鴻運汪子龍話沙田穗禾苑啱啱有單短炒，A座高層1室，538方呎，原業主一個月前用82萬買入，剛以90.2萬轉手，賺咗8.2萬。
代理近期爭做獨家盤，美聯物業今日宣布，攞到西營盤雅賢軒嘅獨家代理權，個盤有環保露台，區內少有。
另外，據聞租住華翠園1360方呎單位嘅知名署長級官員，近日以480萬買咗1668方呎單位。
蘭西