同袁人祥暢遊銅鑼灣甚多啟發。袁人祥話裏原宿水貨正式宣布死亡，估計年尾前有過半水貨舖執笠，唔少老闆趁暑假做多轉就收舖走人。
咁咪同飲食業差唔多，人哋又係預計有過半數食肆執笠喎，失業嗰班Sales點算呢？袁人祥：「酒樓請夥計多，但水貨舖大多老闆兼Sales一腳踢，通常只賺人工嗰份。」
唔係噃，銅鑼灣地帶間「幪面超人」舖仔細細都有兩三個女Sales，重好省鏡㖭。袁人祥繼續：「嗰啲係夫妻檔，通常男朋友去日本攞貨，女朋友就喺香港看舖。夫妻檔點會有勞資糾紛呢？留意吓香港水貨舖好多夫妻檔㗎，而且好多都好成功。」
袁人祥繼續：「講開裏原宿水貨𠵱家以『幪面超人』最勁，行內人流傳，佢哋一個禮拜起碼五日留喺日本摷貨，兩個拍檔輪流駐紮日本，每人每次都帶二、三十萬日圓傍身，其他細舖點同佢鬥？
「加上日本嗰邊裏原宿貨炒風減退，好多人都識上網搵平貨，只有老牌水貨舖做到熟客生意。我都為新入行班細路擔心。」
主持人：大食Jack
八卦熱報：