八強戰要到禮拜五至重燃戰火，呢兩日各位終於可以唞吓，或者將過去近三個禮拜嘅戰績來一個檢討，重整一下手上本錢；好使兩日後再度出擊時更思維清晰，希望贏緊嘅就繼續贏，失利嘅就好快收復前失啦！
要回顧過去五十六場賽事，先講下最受歡迎嘅亞洲盤盤路結果，喺上、下盤分布方面，暫時仍然係以下盤開出嘅比率較高；上盤開出二十次，而下盤就開咗二十九次；唔計四場平手盤，淨捧下盤就暫時有盈利嘞，睇嚟有人話世界盃應該專攻下盤，呢句說話好似仍然成立咁喎！
波膽方面，「1：1」仍然係大熱門戰果，出現次數最多，而「0：1」（前者為讓球或平手盤水位較低球隊）亦出現了七次之多，可見今屆賽事真有一定冷味。另外，近屆都頗常見的「0：0」卻只出現兩次，要博呢瓣，不如玩「首個入球者」嘅「無入球者」重着數；事關烏龍球唔計數，戰果並非○比○亦可能有回報機會。
入球上/下盤方面，隨着近期入球數字有下降迹象，入球下盤變得極旺，單睇近八場比賽，足足開出了七場少於三個入球的入球下盤！而總計到目前為止，入球下盤的出現百分比，亦超過六成。
至於半/全場盤嘅表現，暫時以「和/A」及「B/B」最搶鏡，雖然「A/A」都開出過10次緊隨其後，但係呢瓣通常都熱到飛起，不提也罷。要數抵玩者，「和/和」及「B/A」都可考慮，不過「B/A」通常都出現喺分組賽；實力弱少少嘅喺上半場「偷雞」得手，下半場被實力較優勝的一方反攻陷城池而出現。 文：華度