港股持續下跌，恒指噚日跌123點，收報10832，成交略增至64億元，滙豐（005）繼續受壓，因向阿根廷滙豐注資逾16億元，令市場質疑滙豐為何重要繼續倒錢落海。雖然滙豐已表明，呢一筆錢已經預咗要畀，而且經已撥備，但市場仍以此為出貨藉口，反映港股淡勢已成，任你滙豐點解釋都冇用。
光通信（603）繼續下挫，噚日再跌23%，收報0.12元，成交達1.59億元，股價兩日內已跌41.75%。華晨汽車（1114）亦大跌16%，收1.04元。
ｉ師傅話兩股都有共通點，就係不利消息早已在市場散播，前者與國內合資夥伴不和，後者傳出管理層涉嫌掠奪國家資產而被調查，但不利消息初期傳出後，兩股股價仍企硬，股民絕對有時間出貨，如果咁都走唔甩就唔好怨人。
據聞華晨幕後炒家本身財力頗厚，不過由於成手都係貨，當然難以在短期內出貨，何況現時傳出不利消息，嚇到冇人敢跟，目前惟有繼續頂落去，等不利消息過去後才再作打算，但可能最終都係要面對現實。
據聞辰達永安（1189）炒家與光通信屬同一路人馬，所以噚日亦隨光通信下挫。辰達收0.063元，跌13.7%，成交1810萬元。
第一龍浩（875）噚日勁升11.5%。據聞公司請咗個財務總監，相信好快就會安排一系列財務動作，當然抽水係指定動作之一。早前公司已經通過將每股面值由0.10元減至0.01元，即係話發行新股價格可以低於0.10元定價。此股噚日收0.126元，高於0.10元甚多，足夠大幅折讓配股。
阿 虎