小超李澤鉅（圖左）昨日離開拍賣場時，初時好樂意對賣地成績講番幾句，但後來可能太多行家聞風而至，而且問番同樣問題，小超於是急急腳由保鑣護送上車走人，忙中卻「賴低」得力猛將吳佳慶（圖右）茫然對住記者。好彩小超最後都記得佢，吳小姐接過手提電話後，隨即飛奔上小超架車揚長而去。
有關長實在北角油街地的發展大計，多年來都受傳媒及地產業內人士關注，但小超昨日被問及油街地皮時，竟說所有油街發展計劃「都是傳媒發明出來的」。
前幾年地政總署為了令賣地進行得更有秩序，特別在賣地場外設立記者採訪區，由署方引領投得地皮嘅發展商接受訪問，最初都有唔少發展商企出來受訪，但近幾次賣地，差不多次次都冇發展商肯接受訪問，所以𠵱家拍賣一完，記者就四散搵其他發展商訪問，採訪區反而空無一人。
羅氏地產昆仲家寶及家駒，去年底在賣地場上嶄露頭角後，至今已先後買入3塊地皮。佢哋似乎對新界地特別有興趣，除新增嘅沙田地外，重有大埔滘及西貢大網仔兩幅低密度住宅地。