港股噚日下試10800支持，最後叫做守得住，以10832收市，跌123點。
藍籌股龍頭滙豐（005）及炒股龍頭光通信（603，今日改名中華城市燃氣）雙雙被質，搞到大市氣氛認真差。午市賣地成績雖然較市場預期略佳，但地產股未見受惠，新地（016）跌1.25元，收58.50元。新地不知不覺已由5月高位71元，回落17.6%，55-57元區域可伺機吸納博反彈。
倉內隻鞍鋼（347）噚日跌勢轉急，一舉跌穿10、20及50日線，趙飛雲喺1.18元沽出止蝕，隻股由贏錢變輸錢，主要怪自己太大意，忽略咗光通信爆煲嘅影響力。由於炒股龍頭變蟲，原先打算1.9仙至2仙收集御泰國際（155）嘅計劃亦暫時押後，睇吓呢兩日股仔會否出現火燒連環船嘅情況，再作打算。
港股6月6日反彈至11400受阻回落，當時買恒指Put輪9049嘅讀者當然大豐收，唔使兩個禮拜已有57.4%升幅。雖然大市可能重未跌完，但恒指9RSI已跌至16大超賣，除非再有重大利淡消息出現，否則現水平再造淡風險其實唔低，9049喺0.16-0.18元區域有阻力，不妨考慮獲利。
趙飛雲