昨日唔少二三線股跌到四腳朝天，尤其係今日改名做中華城市燃氣嘅光通信（603），小初真係嚇到腳仔都有多少軟，重以為莊家股一齊玩逃亡潮，但經紀陳話唔係，只係光通信跌得急，牽連其他股仔借勢調整而已。
由於大部份股仔都下跌，唔跌嘅股仔，除咗貨源歸邊之外，當然係另有所圖，好似小初提過嘅盈信（015），傳出可能配股，但股價就仍然企硬喺1.60至1.70元之間。
經紀陳話，市場傳聞盈信今日公布全年業績後，可能會順便配股，但家陣市況麻麻地，真係唔知會唔會成功，特別盈信上半年業績已經錄得3百幾萬元虧損，斷估全年業績都唔慌有驚喜，究竟有咩法寶可以搞得成配股，真係要睇吓幕後人嘅功力。
早前日東科技（365）都搞配股，但搞到𠵱家重未復牌，據聞係配售代理嘅問題，但經紀陳話聽到日東已經換咗另一間行幫手，情況可能會唔同。
慕容小初