本報記者新加坡直擊
西門子8008首部對摺雙芒手機登場

CommunicAsia2002正式開鑼的前一日，有3大手機商在新加坡先行各自舉行記招，西門子便是其一。其實喺同一日香港亦有新機發布會，不過，新加坡的傳媒就可以早兩個小時見到西門子首部對摺雙芒機8008，以及三部新機1168、2128及3118，又睇睇西門子今年點樣發力出擊。

記者、攝影：招佩珊

8008亞洲市場獨有雙芒機
之前曾經向公關大員套口風，問今次會有乜新機睇，得到的是「耳目一新」呢四個字。果然，新機唔再打直而是玩對摺，8008更是西門子首部對摺機，而且更是專為亞太區市場而設。機面有顯示屏幕可以睇到時間日期、電池強度、接收訊號及來電等資料。機身約重73克的8008更備有4和弦鈴聲及可自編鈴聲，而WAP、EMS、日程曆及遊戲亦齊，不過就並未有加入同門新機的Java及GPRS技術。
香港上市日期：8月中
售價：約$2,000-$3,000

2128首部16和弦兼外殼發光
外形的確同2118好相似，不過型號加多10，亦即代表比2118有更多功能。首先2128換上會發光的外殼，其次，新機配備16和弦鈴聲兼可自錄聲音作為手機的鈴聲，西門子是首次將呢個功能加入旗下的手機。另外2128亦同時支援GPRS、Java及EMS，內外兼備。
香港上市日期：9月底
售價：約低於$2,000

3118亞太版玩藍色
3118（即M50的中文版名稱）早在今年德國電訊展CeBIT2002都已經展出過，今次再度登場最主要是告訴大家新機快將上市，而且唔同市場就有唔同顏色，喺歐洲上市的會是橙殼加橙色屏幕背光燈，而亞太區則有呢部藍殼加藍色背光燈版本。
至於其他功能就包括有Java、EMS、GPRS及可更換底面殼。
香港上市日期：7月
售價：約$1,100

1168入門機種可換殼
絕對新鮮滾熱辣，1168只不過剛完成雛型，就已經急不及待被送到現場畀大家先睹為快。外貌同市面賣緊的2118分別唔大，同樣可以換殼上WAP，而最大分別是1168是一部入門機，並沒有加入日程曆、約會提示及數據傳輸等功能，主攻一眾只求打出打入兼Send短訊的用家。
香港上市日期：第三季尾至第四季頭
售價：低於$1,000

同場加映
Nokia失驚無神推出彩芒6610
Nokia在CommunicAsia2002前夕亦召開了記者會，突然宣告推出三頻手機6610，大玩多媒體訊息功能，配備4,096色彩芒，還支援MMS同Java軟件下載技術，內置的Java軟件已包括換算程式（如貨幣、溫度、重量及其他量度單位運算等）、投資管理程式（可追蹤股票價格及走勢），以及Java遊戲。其他功能有免提擴音組合、FM收音機、GPRS、多和弦鈴聲等。
上市日期：第三季