去到非洲國家，你都唔會奢望有咩好嘢食，求祈填飽個肚又唔好食到肚痛已經阿彌陀佛，但係今時今日呢個想法未免太唔Update啦！到肯亞填肚，一樣會有好嘢食，選擇當然唔及香港多，但係勝在物以罕為貴，嚟到首都奈羅比嘅一間餐廳門口，就已經聞到一陣陣烤肉味，原來成大個火爐擺喺入口處，一嚿嚿多肉又多汁嘅劍燒鱷魚肉、鴕鳥肉已經同你SayHello，去埋附近嘅商店小舖Shop吓，原來去肯亞都可以又食又拎！
記者、攝影：朱維達
鳴謝：捷旅假期、阿聯酋航空
其實到首都奈羅比要食好嘢，選擇並唔太多，難得可以去到世界50大餐廳之一嘅Carnivore，確實為呢幾日食到口寡寡嘅味蕾增添唔少口感。
導遊哥哥話肯亞之旅不時會有Surprise，除咗隨時會見到大象獅子同老虎，原來最後一個喺肯亞嘅午餐都有Surprise，正當眾團友都以為又係食小菜幾味嘅自助餐之際，突然嚟到一間烤肉餐廳就即刻眼前一亮，唔係見到靚女！而係見到個熊熊爐火嘅大炭爐，上面燒住各式烤肉，唔好以為又係希臘、南美式烤肉咁簡單，呢度啲烤肉種類多到食都食唔晒，燒牛肉、豬肉、雞肉太小兒科！一齊嚟個劍燒羊肉、鱷魚肉、鴕鳥肉啦！
只要你Order一個日日都轉款嘅午餐，侍應就會攞住一支又長又尖貌似長劍嘅長叉，放喺炭爐上燒，燒完之後就趁熱即刻抽起支叉攞去枱前切畀你，剛燒完嘅肉汁還在源源滴落之際，而肉身經過長劍滑落至鐵板形成嘅煙霧，已經完全感覺到嗰份原汁原味。
原來用餐時，要確保食物熱辣辣到你口，店員會喺用餐前先畀每人一隻鐵板，重係燒到㷫烚烚嗰隻，等你揀咗食邊嚿肉再放落鐵板燒，真係夠晒風味！而且每四個人會有一盆調味料，上下兩層，上層為醬汁，下層蔬菜沙律，最特別係上層，唔同肉類會點唔同醬汁，其組合分別為：酸甜配豬肉、薄荷蘸羊肉、甜醬撈鱷魚、燒烤溝牛肉等，認真講究！
Carnivore
地址：Carnivore未有提供詳細地址，一般LocalGuide都會認識此餐廳，距離SaritCentre亦不過約15分鐘車程。
電話：（254）2-602764/66
傳真：（254）2-602993
網址：
午餐價錢：KSH1,150再加28%稅，約147港元。
啱啱榮登世界最佳餐廳第47位嘅Carnivore，有露天餐廳、酒吧、舞池等，晚上更會有LiveBand演奏助興，餐廳旁有紀念品售賣，不過若果你嫌唔夠多花款，咁你一定要到離Carnivore約15分鐘車程嘅SaritCentre，雖然規模比香港ShoppingMall實在差得好遠，但已堪稱為肯亞最大ShoppingCentre。
SaritCentre交通：SaritCentre離機場約45分鐘車程，機場會有租車公司資料提供，或可乘坐的士（車費須於上車前議價，車費不會超過百港元）。
我買手信就最怕買埋啲裝飾品、鎖匙扣、原子筆，SaritCentre地下嘅BanAnaBox就最啱我，除咗有傳統木雕，重有的的骰骰嘅小型手信，啱晒放入已經密質質嘅行李箱，其中就連T-shirt都有動物紙袋嘅包裝就最吸引！
一間BanAnaBox又點會頂得住你嘅購物癮吖！嚟埋SaritCentre大門口對面只兩分鐘步程嘅購物街就最啱，呢條購物街無特別名稱，但就好易認，一條長長嘅斑馬紋連貫咗約百小商舖，賣嘅都係經典肯亞小手信，刻上特色圖案嘅杯墊、筆筒、小碟都有。同樣啦，標價還標價，你壓到佢一半以下價錢就可以成交，而且先叫合理，不過奉勸一句，除非你真係好鍾意買一啲雕刻例如小象擺設，否則不如唔好買，因為看似充滿光澤嘅雕刻擺設，其實絕大部份都不過用鞋油抹至光滑，相信返到香港，小擺設光澤不再之餘，重會幫你件行李內嘅恤衫底褲免費擦鞋油！
BanAnaBox
地址：SaritCentre,Westlands,Nairobi
電話：（254）2-449595
出門提一提
簽證：持BNO、特區護照及CI者都可以於肯亞機場辦理落地簽證，費用50美金，香港並無肯亞領事館，可向英國領事館簽證部查詢有關事宜，電話：29013111。
旅行團：可參加逢星期六出發嘅東非肯亞‧紅鶴湖國家公園‧瑪沙瑪拉國家保護區精裝假期七天團（團號：JKC），團費：$12,998起。查詢：27350222（捷旅假期）
貨幣：HK$1約兌10KenyanShilling（KSH）
貼士：喺肯亞影相要注意，千祈唔好影到啲政府建築物、軍人同警察，就連小記一次去到郊外舉機諗住影位牧牛阿叔，都畀佢口噏噏問候一番！