國際足協話要搵啲科學家幫手研究，點解啲球員喺今屆世界盃咁易受傷同踢到死吓死吓。但計我求大俠話研究嚟都係多餘，啲球員一季踢成六、七十場比賽，重邊有力打世界盃吖！
好幾位世界級球員好似法國施丹、葡萄牙費高同阿根廷華朗咁，唔係受傷就係喺場上踢到無晒影，直接搞到自己隊波喺首圈出局，重影響埋往後賽事嘅可觀性；國際足協見到咁就拿拿臨開會商討對策，重話要搵啲科學家研究吓啲大哥級球員點解會喺呢段時間油盡燈枯。
國際足協與其搵人嚟研究，不如勸吓歐洲足協同各地嘅足總同聯賽會搵少啲，減少啲比賽好過；但成數有幾高，大家心裏有數啦！
意大利「羅馬王子」托迪上場波踢得曳，引來各大傳媒同名宿批評，當中包括「凱撒大帝」碧根鮑華。不過托迪呢個世界仔回應得好妙，話如果自己冇級數，「凱撒大帝」又點會留意佢？證明自己有料到喎。佢答得醒又夠自大，抵你做王子。
日前有南韓報紙報道，葡萄牙費高叫南韓李榮杓放水畀佢哋，打和一齊出線次圈（但南韓最後贏一比○）。不過，睇番葡萄牙足總冇就呢件事作出回應，而外國幾間通訊社亦冇跟進，就知呢單嘢有幾堅啦！
墨西哥球員可能冇「士啤」球衣替換，如果唔係點解喺噚日對美國場波，前鋒波格迪着嗰件波衫甩咗字都唔換過。佢件衫正面睇冇乜問題，但後面睇就頂癮囉，事關印喺衫後面嘅英文名B字喺比賽中甩甩吓，真係名副其實輸到甩「轆」！
美國噚日能打敗「同鄉」墨西哥，自三○年以來歷史性殺入八強，可能真係要多謝吓總統喬治布殊。事關佢喺兩軍大戰前夕，終於大開金口打電話祝福班球員旗開得勝，佢話雖然好多美國人同佢一樣對英式足球一竅不通，但對球隊嘅表現都感到非常自豪，令到班球員當堂士氣大振，唔怪得佢哋踢得咁鬼生猛喇。
喺漢文對曉域治嘅皇后會網賽決賽，無端端變咗愛爾蘭對西班牙嘅世界盃十六強賽。因為喺漢文對曉域治時，剛好係愛爾蘭對西班牙，而喺網球場附近嘅酒吧，啲人又好大聲咁為愛爾蘭打氣，搞到漢文冇癮又分心，唔知係咪因為咁，呢位英國紳士最後重輸埋㖭呢！