樓市環境今時唔同往日，新盤好少能夠賣個「滿堂紅」，到入伙都有貨尾剩嘅盤真係多到數唔晒，中原今日開幕嘅尖沙嘴海防道分行，就設咗個「發展商樓盤資訊站」，有齊港九同新界一手樓盤資料，提供一站式服務。揀呢個分行設立資訊站，係因為唔少睇樓團都響呢區搭專車。個概念聽講係由九龍區揸fit人劉一姐諗出嚟。
香港近年都好少有大規模房地產展，不過內地就成行成市，蘭西最近收到泛城（中國）物業報告，列出3月到12月各主要城市的地產展，單喺北京就有15個房地產展銷會或家居裝飾博覽會，有啲月份重有兩三個，都咪話唔誇張。
地產代理近期積極搵獨家盤，目的當然係想賺盡啲，蘭西聽講有代理行不惜自費負責一切宣傳推廣開支，同時重承諾收少啲佣金，真係一個唔覺意變成蝕本生意。不過，最開心可能係發展商，因為可以慳番好多。
中原地產沙田帝堡城分行陳麗芳話，富豪花園翡翠閣高層F室銀主單位，面積680方呎，啱啱以120萬賣咗，呎價1765元，低市價超過12%。買家係馬鞍山區租客，因為計過數月供只係4500蚊，諗咗兩日就拍板。
蘭西