日本及南韓為首晉八強分途而戰，大有機會上演兩場入球量少嘅賽事，是日過關組合可用日本和局一比一做膽，拖南韓幾瓣屬於入球下盤嘅組合。
今日兩場賽事，兩支主辦國球隊分途出擊，為亞洲球隊創造歷史，首次晉身八強而戰；不過，我就覺得兩場波如果唔係特別有邊隊支持嘅話，都好難睇得投入及過癮。事關對賽嘅四支球隊，入球能力都係麻麻地，就咁睇個形勢，今日可以轉敲入球下盤，尤其係意大利對南韓一仗。
記憶之中，有意大利嘅比賽不嬲都無乜入球出現，就算今屆賽事，三場分組賽亦開咗兩場入球下盤（對厄瓜多爾及對墨西哥）；而南韓嘅比賽亦同樣入球唔多，或者同佢哋嘅出色體能，響比賽中用嚟同對手爭奪中場及破壞，攻力自然減弱有關，響三場分組賽入面，就全部開入球下盤嘞。兩隊都守優於攻又唔旺入球，呢場波有一點七倍分頭嘅入球下盤應無走雞；嫌熱嘅索性玩全場入球總數，博兩隊加埋入唔到超過一球，「○至一球」都有成三點一倍㗎！
至於日本對土耳其，大熱波膽一比一可以小敲，事實上最近都幾旺開呢瓣熱門，可以做膽拖番以上提到嘅「南韓入球下盤」、「南韓和局○比○」、以及「南韓全場入球總數○至一球」，將呢個大熱到只得五倍半嘅波膽「增值」。
最後再提醒大家，到目前為止，啲亞洲盤路仍然好似早前所講咁，好難冧到去第三鋪；捉路要訣係見到啲盤路連冧兩鋪嘅時候，例如連開兩口上盤，就響第三場出擊下盤，成功率仍然高企。 文：華度