去完記者招待會，同靚女阿美一齊搭的士返上中環，阿美個老公乃係威水專業人士，揸飛機嘅，薪水自然有番咁上下，如果阿美返屋企做師奶，大有條件，唔使喺中環捱得辛苦。但阿美讀完大學，唔想嘥料，堅持要打工，亦係人各有志也。
呢排阿美做到索氣，由朝做到晚，幾乎係終日無休。既然一齊坐的士，於是問佢點解咁博？阿美話：「本來都覺得幾攰，想休息吓嘅。但上個月參加昔日一班××商會嘅老友聚會，全部人嘅年紀都係三十零四十歲，大家唔見好耐咯，以前人人意氣昂揚，有CFO啦，有營業經理啦，有人事主管啦，多數係中層管理人員，得閒就到××商會做義工搞活動。但現在呢？唔講唔知，竟然有近一半人失咗業，我真係嚇死咗。四十歲以下，十幾年工作經驗，正係當打之年，竟然失業多時，在家食穀種。見完佢哋之後，我唔敢再呻工作辛苦，要儲番一筆錢至得！」
阿美話失業率唔止七巴仙，起碼佢嘅白領老友之中，就有唔少失咗業。左丁山唔敢同佢拗，只好閉目養神，諗吓𠵱家某些中產階級嘅情況，佢哋唔會係人才錯配，亦唔係低技術勞工，點解亦係朝不保夕呢？陳啟宗話只要董生在位一日，樓價就唔會飛升。唔通董生在位一日，失業率就唔會急降？