下一位大紫荊勳章得主係──梁愛詩！象徵住愛國愛港最高榮寵嘅大紫荊勳章，今年得主誰屬，好快就有答案。
小圈子近日流傳，今次終於輪到律政司司長梁愛詩獲勳。如果屬實，詩姐會係繼杜葉錫恩同陳方安生之後第三位喺特區「封賢」嘅女士。
本來「煲呔曾」都係理所當然嘅大紫荊熱門人選之一，不過，有人話煲呔已經有英國爵士銜，暫時未必輪到佢。其實自從上年爆出個可歌可泣嘅「六七暴動」領導人楊光之後，大紫荊嘅意義已經完全係另一回事。小市民對於大紫荊封賢嘅印象，亦難免要刮目相看。
講番六十三歲嘅詩姐，佢外公黃冷觀係孫中山時代嘅革命義士，爺爺就係著名藥房梁國英藥房嘅創辦人。
梁愛詩律師出身，一九八九年晉身廣東省人大代表，九三年做埋全國人大。詩姐任內嘅政績惹人爭議，居權案呈請人大釋法、胡仙案、潘啟迪案，件件都咁令人回味！
傳真︰2623-9278
電郵︰