南韓嘅電視台為咗今屆世界盃，可謂絞盡腦汁，乜嘢法寶、大小智囊團都團都出齊；由賽前花絮、預測，到賽後直擊、評論，可謂扭盡六壬，多面體咁炮製呢個世界球壇盛事專輯，由朝到晚都係世盃專輯，有軟有硬，有直擊有感性，總之乜都有，而收視亦全面上升。
南韓最受歡迎嘅電視台MBC（文化廣播電台），為咗今次世界盃，特別邀請車範根擔任賽事旁述；呢位踢波出色、做教練又掂嘅足球名宿，原來講波亦有一手，加埋個仔車斗利經佢悉心栽培後，亦成為國家隊代表，抵佢被封為韓版「足球智多星」嘞。
講番MBC，佢哋今次世界盃嘅新聞部採訪小組，真係多到你唔信，除咗正路嘅賽事前後報道外，每逢南韓比賽，估計KBS重有超過二十支採訪隊喺南韓全國作現場直擊。
好似上次南韓對葡萄牙期間，佢哋先後派隊去咗歐洲葡萄牙，採訪當地葡國球迷睇波打氣實況，當然唔少得南韓葡隊軍營，重有佛寺、大小家庭、離島、酒吧及全國各大城市熱門集會地點進行採訪；而最出位就係其中一支採訪隊，竟然去埋殯儀館作現場直擊，喺電視新聞睇見，一班着晒孝服嘅子子孫孫，一邊守夜一邊睇世界波南韓對葡萄牙直播，到朴智星入球後，佢哋個個重彈晒起身拍手掌慶祝，真係搞笑到你唔信。