劉德華歌迷會「華仔天地」唔經唔覺已經十五周年，前晚舉行慶祝活動，又適逢係父親節，順道同華仔爸爸賀壽，華仔送蛋糕畀爸爸，場面好感人。林家棟就係嘉賓，重即場表演㖭。
華仔以英格蘭球星碧咸嘅髮型示人，佢又留埋鬚，驟眼望落去又真係有幾分似碧咸嘅，佢話：「呢排我日日睇世界盃，我支持英格蘭同碧咸㗎。」華仔重話歌迷咁支持佢，佢特別同嘉賓Ba叔同劉偉強每人拎咗五千蚊出嚟抽獎，結果有十五個歌迷，每人得到一千蚊獎金，而大會亦向有十年會籍嘅歌迷頒發「老人牌」。
為增加氣氛，華仔嘅歌迷又大搞模仿大賽，華仔喺電影《愛君如夢》曾扮張國榮（哥哥）演唱會嘅着裙造型，有男歌迷有樣學樣，嗰個男歌迷事先重剃埋腳毛，幾大犧牲；亦有女歌迷扮電影《嚦咕嚦咕新年財》中梁詠琪嘅巨胸造型。
曹達華（華叔）嘅契女陳寶珠同米雪都好有心，前日父親節同華叔食飯慶祝。不過最令華叔驚喜嘅，係佢個仔曹立濤特登喺英國返港，重叫華叔得閒去英國度吓假，華叔不知幾開心，但佢只係話：「睇吓點啦！」華叔個仔咁孝順，陳寶珠同米雪又咁照顧佢，華叔真係有福氣。
楊恭如日前公開表示同傳緋聞嘅上海首富周正毅係親朋戚友，大家自幼就相識。楊恭如早幾日出發去台灣拍新劇《一切從結婚開始》，同劇演員重有方中信同黎耀祥，楊恭如就話：「我𠵱家以事業為重，追我嘅男人梗有啦，不過感情重未穩定。」
孫燕姿嘅新歌《我不愛》今日開始喺「路訊通」播放，呢首歌嘅MV重去咗新西蘭拍㖭！
由於孫燕姿自幼喺熱帶地方長大，所以佢一直對雪山同冰河嘅印象只係喺書度睇過，呢次因為工作可以親身喺新西蘭接觸到，佢都覺得好開心。
馮仁昭有日同無綫監製李添勝傾偈，講到重有兩個幾月就係美國「九一一」事件一周年，添哥即刻眉頭一皺。佢話自己兩個仔女已經大個，喺美國又搵到幾好嘅職業，佢以為自己可以享吓清福。點知九一一之後，美國經濟衰退，兩個仔女重失埋業，到𠵱家成大半年都搵唔到工做，真係陰功。
𠵱家除咗拍戲會用電腦動畫之外，原來拍廣告都會用新科技，馮仁昭知道最近鷹星保險嘅廣告，就搵咗導演侯仲賢執導，而負責動畫嘅鍾智行，之前都參與過電影《少林足球》同埋《風雲》嘅製作，將真實嘅畫面同動畫結合，馮仁昭覺得呢種科技會愈來愈普遍。