今日嘅巴西對比利時，個人認為巴西勝望壓一，當中一啲賭盤應能為大家帶來獲利良機，例如半/全場嘅「A/A」、「入球上盤」、以及用比利時入一球去串射波膽。
睇過晒巴西三場分組賽，發覺呢隊波非常對辦，完全無晒響外圍賽嗰種失準表現；或者有人話同組對手實力平平，對巴西起唔到咩嘢考驗，但係換另一個角度睇，咁樣可能更加有利，就係借呢三場波更加打起晒巴西兵嘅信心。
話到尾我呢場就起碼秤高巴西一線，呢個亦係好多人嘅心目中指標，望吓啲賭盤，瓣瓣都熱到飛起就知啦。雖然啲盤係熱啲，但係穩執嘅話都無理由唔落手。歐洲盤巴西贏波得嗰一點三倍，依然可以出擊；如果真係嫌熱得來唔吸引，可以向半/全場盤落手，巴西最近兩場都可以響上半場入到波，好快就嚟料，呢個半/全場當然要敲A/A啦，有成一點六倍㗎！
今仗嘅入球上/下盤亦可吼，事實上呢排每個比賽日嘅入球上/下盤盤路，都分布得好平均，如果嗰日打四場嘅，就上、下盤各開兩場，打兩場嘅話，就上、下盤各開一場，今日可以照跟呢條路；睇返頭場墨西哥對美國，過往兩隊交手嘅入球數字，多數都係開下盤。咁即係話，呢場佢哋又好大可能繼續夾埋入唔到三球，巴西呢場就入球上盤可期嘞。
最後敲埋波膽，講真巴西後防重未算銅牆鐵壁，呢支森巴雄獅傳統上亦非以防守出色見稱，今仗可以博巴西失一球，敲佢哋贏二比一、三比一、四比一。最重要嘅係，巴西失一球嘅波膽係比較好分，值博率高。
文：華度