一直以嚟迪士尼嘅角色，由米奇老鼠、PeterPan到白雪公主都係規規矩矩嘅聽話一族。之不過一隻嚟自外太空嘅超級破壞王史迪仔，將會打破呢個形象，佢唔單止喺電影海報上嚇到小矮人同阿拉丁企埋一邊，而且更連F4嘅「紅字條」都唔怕，更要4位靚仔攬住佢，兼為佢唱埋主題曲。想早一步收服呢隻百厭星，就要快人一步昅住呢批新到精品。
記者：張穎倫 部份攝影：林栢鈞
科學家強霸博士在一次實驗中創造了史迪仔，但由於載入的超強破壞程式不受控制，令實驗失敗，要將史迪仔收監！押送期間，擁有高超智慧的史迪仔發難逃走，穿越時空直撞到地球的夏威夷！為掩飾身份，史迪仔扮成一隻奇怪狗仔，避開博士追捕，並得到小女孩妮露收養。妮露嘗試教導以「破壞為本」的史迪仔，但反而俾佢玩轉整個夏威夷！正當妮露心灰意冷之時，星際聯盟委派人捉去妮露……究竟史迪仔會否拯救她？想知就要留意7月11日上映嘅電影啦！
言承旭和朱孝天咁高大，當然要搵最大隻嘅史迪仔先可以襯起佢，話晒呢隻高達12吋嘅毛公仔，都係今次最大件嘅精品。再加上佢極之軟熟，攬住佢瞓覺就最過癮。另外呢隻史迪仔，亦跟足電影造型，有埋心口毛毛，其他細公仔就冇咁仔細啦！
嫌毛公仔得個睇字唔夠好玩，小記就推介呢隻妮露嘅10吋大Figure，皆因佢配件夠晒多，包保唔會悶。佢唔單止手腳關節可以郁動，更有泳衣、T恤同短褲仔任你替換，又可以將呢批衣服同毛公仔，一次過放入小旅行袋內，方便收納。
其實今次除咗史迪仔同妮露之外，亦有其他角色登場，好似妮露嘅家姐蘭莉、黑超「社」工光頭先生、儍頭儍腦嘅強霸博士同獨眼霹靂，全部都極之搞笑。想一次過集齊佢哋，呢套3吋Figure套裝就一定啱你，而且佢更一次過有齊破壞王同可愛史迪仔兩個造型，夠晒抵玩。
小朋友就快放暑假，呢套靚靚顏色筆最啱小朋友上暑期興趣班學畫畫。呢套水筆套裝，唔單止有個印有女主角妮露嘅精緻筆袋，而且更將粗幼水筆分類裝好，夠晒整齊。最厲害係全套共有45種顏色，小朋友想顏色點配搭都無問題。
香港學生功課多，書包重就係人都知，所以呢個史迪仔書包就採用手提篋設計。書包底有轆，而且又有手柄可以拉出，方便小朋友將書包拉動，唔使孭到背脊攰一攰。再加上書包印有大大個史迪仔，小朋友帶返學都特別醒神。
橙色短袖T恤，本身已經勁襯今個夏天嘅格調，加上呢件衫嘅底色採用暗花史迪仔圖案，另外再加3幅打直排列嘅細彩色劇照。設計夠晒特別，小朋友一定覺得型仔。
女孩子去海灘玩，呢件T恤就一定最啱，事關呢件衫以妮露嘅夏威夷Look作為圖案，再襯埋花邊設計，小朋友着起極有陽光氣息。
呢個網頁除咗有《扮嘢小魔星》嘅Wallpaper畀你下載外，亦有香港未有得賣嘅精品發售，好似涼鞋、水槍等，價錢唔算貴。運費方面由電腦自動計算，不過由於頭3-5件貨品都會收約$270嘅運費，所以一次過買幾件就可慳番唔少運費啦！
網址：
夏天興着涼鞋，無論行街定去沙灘都可以着對周圍去。呢對涼鞋以妮露做圖案，最靚係鞋頭上加有立體小花，小女孩着上特別可愛。
史迪仔嘅專用激光槍，火力強大又有型，想有一支的話，就可以選擇呢支外形一樣嘅強力水槍。只要用2粒AA電推動，就可以達到36呎射程，而且又識着紅燈，有姿勢有實際，夠晒好玩。
TheDisneyStore（25061073）
銅鑼灣時代廣場501號舖
Bossini
查詢電話：23711633