上個月小初曾講過，東南亞木業（1205）急升似虛火居多，之後股價真係繼續浮浮沉沉，但上周四開始情況唔同，不單止成交大增，兼且重升到破晒位。東木上周五最高見過1.51元，收1.49元，升10.4％，係近大半年以來高位。
經紀陳話，佢發覺買盤除咗來自向來睇住呢隻股嘅本地炒家外，重有一批講普通話嘅客人。
好耐之前東木已經傳過，同揸住東木10億銀可換股債券嘅北京中信，合作喺新西蘭收購森林，但係單deal一直都未見成事，直至5月份，先至證實北京中信有份參與競投。
上周新西蘭方面再次傳出，話會喺兩個星期內有結果，可能有春江鴨收到風，所以唔理世界盃同埋市況淡靜，都借勢炒一轉，但就算中信真係買咗個森林，但幾時會落實同東木合作，又或者行使債券名正言順做東木大股東，家陣重未知，所以經紀陳都話睇定啲先算。
慕容小初