今夏熱到飛起，無錢去避暑山莊的你，一樣有消暑妙方，說的是有創意消暑甜品與特飲，伴你度炎夏，新口味包括透心藍特飲、前所未有的芒果配綠茶、西班牙雞尾酒Sangria變啫喱……款款甜品亭亭玉立，杯杯涼入心，啖啖甜蜜蜜。
記者：楊一凡
攝影：伍慶泉
原名ClassicSangriaJelly，有幾經典吖？啫喱充滿紅酒香，嗒嗒吓又有梳打和檸檬味，中間夾雜了新鮮士多啤梨、藍莓和橙肉，入口即溶，份量適中，是餐後的美味甜品首選。
係時候跟咖啡味Tiramisu分手，讓自己一嘗貪新忘舊的滋味，把士多啤梨的鮮豔注入啡白的Tiramisu當中，軟芝士變成浪漫的粉紅，Ladyfingers同樣索滿冧酒和咖啡甜酒，入口時多一份果肉酸甜。
藍色冰川Glacier像冰山一角，浮沉碧海中，呷一口，熱情果汁、青檸汁、梳打和藍色柑橘酒的味道一併湧上來，味道幾似帶點酒香的低糖的波子汽水。
史無前例的組合，甘香微澀的綠茶，遇上香軟幼滑的軟芝士，中間楔滿鮮甜的芒果肉，清淡油滑的芝士化解了綠茶的澀味，甜到膩的鮮芒果給甘香軟滑的甜品，帶出夏日新鮮感。
店名：Mint
地址：尖沙嘴廣東道122至126號（港威大廈對面）
電話：27355887