漢城嘅禮拜日，市面變得平靜。街上嘅報紙檔，亦只賣着禮拜六嘅報紙；請教當地行家，原來南韓報社統一喺禮拜休息，世界盃期間亦無變。
可能有人會問，禮拜日重有場西班牙對愛爾蘭喺水原舉行，但如果南韓報社休息，咁咪冇記者去採訪呢場十六強大戰？查實南韓記者所謂嘅休息，原來只係報社停出報紙一天，記者工作仍然冇停過。
南韓報紙嘅工作流程，其實同香港有好大分別，當地印刷傳媒記者，一般上晝七點準時返公司將噚日採訪嘅新聞撰稿，報紙大約會喺上晝十一點發售；而報紙出街後，記者才開始當日採訪工作，完成後更可直接放工回家。
遇上周日有賽事，記者唯一休息時間只係當日上晝唔使返公司，夜晚仍然要出球場採訪。其實，喺南韓做記者工作雖然辛苦，但係當地人一般對記者都好尊重，社會地位亦有番咁上下。而當地一般人月薪大約六至七千港元，有三、四年經驗嘅記者人工大約已有萬五至萬八港元，咁高收入，辛苦啲又有乜所謂。