早前福特嘅人事大變動，自LeonardCheng出掌舵手後，銳意改革確實有一番新景象；而重新包裝嘅Mondeo亦為車迷所受落，銷量重穩步上揚㖭！但令Leonard大感頭痛之事，莫如上手訂落嘅一批Laser家庭車終於運抵香港，若然唔盡早脫手的話，只會係佢哋嘅一項沉重負擔。唔知係咪咁嘅原因，起初話好有機會賀新Showroom開幕嘅Fiesta，家陣就改為原本Laser嘅限量版Lidea化身；既有齊天窗、又有高級CD音響、ABS連EBD裝置，加上一台1.5公升直4偈配4前速自動波，相信對銷售會有一定刺激作用。至於對萬事得運作非常熟識嘅Leonard，更將呢部Lidea特別版定價響8萬8千蚊，較同級相若嘅萬事得323還要便宜多一點，對要求實用嘅家庭車客嚟講，無疑係好有吸引力㗎！