電腦新產品：
acer趕世界盃熱潮　AspireM500勁加AV功能

個人電腦發展落嚟，已經唔再淨係為應付工作咁簡單，加入影音功能似乎係大勢所趨，最佳示範作係SONY嘅VAIO系列，𠵱家就連台灣廠商acer，都將一堆影音功能加入新系列桌面電腦內，進一步將電腦實用性增強，最啱錄低世界盃節目慢慢欣賞。

記者、攝影：徐影龍

視像即播即錄
acer今次將各式影音功能加入Aspire桌面電腦內，令電腦用途不再局限喺工作度，娛樂或其他實用性都大大加強。AspireM500最大特點係加入一張TV視像卡，除可接駁傳統RF電視插頭外，亦可以S-Video接駁各式影音周邊，透過顯示屏便可收看電視節目。再配合卡上嘅視像擷取功能，將視像記錄在硬碟上，搖身一變成一部錄影機。
利用硬碟儲存最大好處，除咗慳番一大筆錄影帶錢外，最正當然係可即時作編輯，例如自行製作心愛球隊激烈賽事，又或剪輯精華入球等，再燒埋VCD作收藏或送畀朋友都咁盞。處理器採用P42GHz，而底板晶片組採用SiS650，運算圖像性能表現不俗，不止縮短編輯影像時間，打3DGame都可獲得高解像兼流暢嘅效果。

聽歌免開機
相信好多人在工作之餘，亦會利用電腦播放心愛CD，一邊工作一邊聽歌。AspireM500除電視錄影功能外，亦首度加入免開機聽CD功能，透過機頂控制面板，用家毋須啟動電腦，都可即時欣賞AudioCD，機前亦設有小型LCD顯示歌曲編號，齋聽歌都毋須啟動電腦咁大陣仗。
潮流興Wireless，桌面電腦當然毋須無線網絡，雖然AspireM500都設有Wireless裝置，不過就係無線鍵盤同光學滑鼠，由LogictechOEM製作，鍵盤設有多個功能快捷鍵，如標準嘅音效播放控制台，一按上網、接收電郵等功能，透過驅動程式，可自行定義各種快捷功能鍵，一按便可開啟常用嘅軟件，如《OFFICE》、《PhotoShopLE》等，操作上方便不少。

機箱設計值一讚
今次acer喺呢款Aspire機箱內花咗唔少心思，雖然已內置TVTuner同FireWire等配接卡，不過機身設計仍然好纖薄細部，對於家居環境不大嘅用家尤其適合。除咗設有免開機聽歌控制面板外，機前重設有一組擴充FrontPanel，內有多種擴充制式插頭，如USB、耳筒插等，最特別係設有FireWire插頭同首度加入MemoryStickSlot，接駁DV或SONYMP3Player都好方便，據負責人講，acer已成為全球第四間生產MemoryStick嘅廠商，稍後會有自己牌子嘅MemoryStick推出。
要注意係機內兩條PCI插槽已經被Modem及FireWire佔用，只剩一條AGP插槽，另加強勁顯示卡還可，若想加入其他PCI裝置如SISC卡、音效卡就唔得喇。

記者意見
抵讚：電腦性能強勁，加入影音功能亦屬acer一大突破。
要彈：雖然影音功能齊備，不過差不多萬二蚊一部桌面電腦售價，未必人人負擔得起。

acer(HK)
查詢電話：25280233