喺英格蘭贏丹麥場波,國際足協判咗李奧費迪南入首球,但英國幾間博彩公司好似威廉希爾同立博,就話嗰球係烏龍波,所以買中李奧費迪南都冇錢收。佢哋咁樣做對投注者好唔公平。
威廉希爾話奧雲首入球雖然得四倍半,但就有過萬人買;而賠率有成四十一倍嘅李奧費迪南,卻只得好少人問津;所以佢哋咁做,其實係勁蝕。威廉希爾嘅發言人沙柏咁話:「李奧費迪南頂嗰球波未過白界,只係對手擺烏龍,所以根據PressAssociation(英國報紙聯合社)嘅判決,入第二球嘅奧雲先至係首個入球者。」
不過,我求大俠就覺得佢哋咁做有啲唔合理,事關國際足協都判咗嗰球波係李奧費迪南射入,所以佢哋應該根據官方嘅公布派彩,唔應該以其他來源作依據。
極有可能同巴西喺八強相遇嘅英格蘭,賽前鬼咁高調,猛咁話唔驚巴西,重話好有信心入四強;不過佢哋暗地裏其實好努力咁幫比利時打氣,希望比利時打低巴西。老實講,英格蘭對住巴西真係冇乜贏波本錢(打雨戰另計),但對比利時就唔同,起碼半隻腳入咗四強,所以佢哋係支持邊隊,大家心照啦!
國際足協話日本同南韓嘅六月天都會係咁落雨,甚至決賽時都唔例外,所以已經呼籲入場睇波嘅球迷記得帶遮同雨褸,費事搞到淋濕身病咗。話時話,我求驗客相信呢啲天氣真係對英格蘭同德國有利,至於技術型嘅巴西,就唔多着數。不過,上屆由法國攞冠軍,今屆計攤路都應該輪到南美球隊啦啩。
英格蘭中場碧咸喺前晚對丹麥場波,先後向三位入波功臣李奧費迪南、奧雲同希斯基送上香吻;之但係,從奧雲嘅表情睇嚟,佢似乎唔係太接受到俾男人咀,喺碧咸咀佢嗰陣時表現得非常抗拒。唔怪之得今屆奧雲仔到現時為止,得一個入球咁大把啦。
瑞典喺噚日輸畀塞內加爾,佢哋嘅中場A史雲遜真係要負好大責任。事關佢喺禁區內有一個入球機會,明明可以起腳射,點知佢就賣弄腳法,要磋過對方後衞先射波,結果個波就中柱唔入。佢呢腳唔入,瑞典轉頭就俾塞內加爾嘅H卡馬拉搞掂,所以呢個鑊佢真係孭硬。