大佬田北俊即將貴為行政會議成員，二少田北辰做咗九鐵主席之後人氣急升，兩兄弟邊個醒啲？真係難分軒輊，之不過喺父親田元灝眼中，似乎就偏愛個細仔多啲。喺噚日嘅港台錄播節目《舊日的足跡》裏面，田二少講述咗一段田氏昆仲嘅真情對話。
話說好多年前，阿俊同阿辰喺美國開完一個會議之後，兩個大男人走去沙灘漫步，展開一段咁多年嚟最heart-to-heart嘅對話。閒談間，大佬問細佬肯唔肯返香港幫手打理家族生意，細佬答話驚住兩個咁好勝嘅人合作唔嚟；大佬於是就呻咗一句：「係呀，咁多年嚟你讀書又叻過我，爹哋媽咪好多時都提起你，唔多提起我，做大佬嘅，呢啲嘢都唔係咁易接受，我都要發憤努力，畀番啲成績爹哋媽咪睇。」
原來大佬細個讀書成績普通。細佬就唔同，入到哈佛商學院，令到爸爸不知幾高興，因為當時香港一年得一、兩個人入到哈佛。田二少話：「我覺得爹哋好開心，直情係引以為榮，但係我覺得唔係幾好，好多認可都喺我身上，我阿哥會點諗呢？」
田老先生夫婦都係好慳嘅人，雖然家境一直唔錯，但係媽咪買嘢仍會同人講價，三蚊講到兩個半，田二少認為畀多少少算啦，你估阿媽點講？「呢個係心態問題，今日三蚊變兩個半，第日就係幾千萬、幾百萬嘅分別。」係咪抵佢哋發呢！
傳真︰2623-9278
電郵︰