歐洲人玩死強隊？韓日兩支亞洲隊打入十六強，除咗係呢兩個國家付出努力所得到應得成果之外，一眾強隊出局都係因為球員疲勞過度有關係。
世界盃開始以來，南韓平均氣溫雖然接近三十度，但係濕度唔算太高，對歐洲球員喺比賽表現影響不致於完全失去應有水平；之不過，喺仁川文鶴球場睇見費高好想擺脫對手嗰陣，卻有心無力。再諗起施丹早前對丹麥追波時狼狽倒地情景，兩位世界最貴球星喺世界盃落得如斯田地，只有怪歐洲人不斷將每個球季比賽場數增加，一星期踢三場比賽，當球員係機械人嘅後遺症。
南韓四十九年來第一次打入世界盃十六強，全國都好似贏冠軍一樣，由仁川返到漢城後雖則已經深夜，但依然有好多人喺街上慶祝，唔少人坐喺車頂，攞住支南韓國旗大叫DaeHonMinGu（大韓民國），可見國民等呢日等咗好耐。