二○○二年沙田龍舟競賽噚日喺沙田城門河舉行，今年無綫冇出動花旦、小生壓陣，反而搵咗陳凱怡、韋家雄、王可惠同黃宇詩扒龍船。
可能因為今年無綫龍舟賽冇人壓到陣，所以佢哋喺比賽中只得第五名。而擔任隊中打鼓要任嘅陳凱怡就笑住話：「冇包尾已經好意外。」對於被批評唔識打鼓兼打亂拍子，陳凱怡就話：「我喺前兩日先知要扒龍舟，所以冇綵排過，不過啲隊員都話我打得OK㗎。」
此外，汪琳今年要喺現場做直播主持，要曬足幾個鐘頭，所以汪琳事前做足防曬工夫，更冒中暑嘅危險着長袖風褸以防曬黑，汪琳話當時雖然有少少暈，但佢竟然話可以乘機減肥喎！
宣萱、林保怡同苑瓊丹（苑仔）噚日喺屯門出席公開活動，苑仔噚日同觀眾玩遊戲時，取笑一個小朋友做「崩牙仔」，結果個小朋友同佢講：「你咁冇禮貌㗎！」
此外，問到保怡有冇問候好友蘇永康？保怡話：「我有打電話畀佢，我贊成佢返台灣，因為件事喺邊度發生就喺邊度解決，畀我一定去面對，唔係日後點見人呀。」
邱淑貞（豆斗）前晚同老公沈嘉偉喺上海公幹返港。豆斗自從嫁咗之後，十足十跟得夫人，佢老公每次出外公幹，佢都跟到實，所以成日出現機場。豆斗前晚見到大班記者喺機場守候，就問：「你哋等邊個呀？」當佢知道等緊蘇永康，佢竟然話：「我同佢唔熟㗎！」
章子怡前晚飛抵台灣，噚日雖然係端午節，佢都要馬不停蹄出席各項活動。佢首先應著名女性雜誌《瑪利嘉兒》（MarieClaire）台灣版嘅邀請，同雜誌嘅總編輯暢談對「圓女人的一個夢想」嘅睇法。
之後章子怡就去到內湖大潤發賣場進行慈善義賣，而所得善款更會全數捐畀當地嘅勵馨基金會。
早排有報道話李麗珍同排舞師林青峰拍拖，後尾知道對方原來已經有女友黃敏燁之後，就走去林青峰間排舞室度嘈。前晚黃敏燁出席會展《白夜追兇》首映禮時，就同林青峰劃清界線，佢話唔清楚珍妹同林青峰嘅嘢，而佢由始至終都冇同林青峰拍拖。
盧巧音噚日去銅鑼灣接受訪問，佢覺得近日同余文樂分手一事，已經講得太多，佢話：「我覺得呢個話題，已經講咗幾日啦，所以應該係時候close咗呢個file啦，真係乜都講夠啦。」
黎小田前晚同新人梁慧家，出席灣仔君悅酒店舉行嘅台灣電影節。黎小田話：「我哋簽咗十年約，佢𠵱家做緊RoadShow主持。」黎小田又透露合約訂明唔准結婚生仔，問到合約年期咁長，係咪想學英皇？黎小田話：「乜嘢呀？係楊生（楊受成）學我咋。」
顏仟汶前晚喺尖沙嘴，幫藝進同學會籌募經費嘅餐舞會做司儀。顏仟汶話嚟緊會拍兩部電影，一部露兩點，一部露三點，原本佢有機會同韓國變性藝人河利秀合作，但河利秀推咗部戲。顏仟汶話就算合作，都唔怕人將佢哋身材比較，因為佢自己係真材實料喎。