楊恭如早前與有上海首富之稱的周正毅傳出緋聞，昨日她澄清與周正毅是二十多年朋友，並於幼稚園年代已認識對方。楊恭如揚言兩人關係是親朋戚友，並非緋聞女友。
前晚賽馬會於君悅酒店舉行「香港賽馬會冠軍人馬獎頒獎典禮」，亞視新任行政總裁陳永棋率領一班亞視藝人包括朱慧珊及陳煒等赴會，而久未露面的楊恭如，亦與好友琦琦一同出任頒獎嘉賓。
早前有報道指楊恭如與有上海首富之稱的周正毅過從甚密，更傳她今年四月親自到上海與周正毅會面，而周正毅的太太毛玉萍對於兩人的緋聞，更表示只要丈夫開心便沒有問題。
前晚佩戴一身名牌Cartier首飾出現的楊恭如透露，現正養尊處優，她說：「自從一月拍完《西遊記》之後，整親條尾龍骨，𠵱家都要做推拿，又唔拎得重嘢，落雨都會唔舒服。不過受傷都唔會影響工作，我都想休息吓，好似之前都同媽咪去了上海玩，嚟緊我會去台灣同方中信拍劇。」
提到楊恭如與周正毅的緋聞時，這位緋聞女主角似有備而來，她說：「有人同我講過，冇乜特別，我哋識咗好耐，我幼稚園已經識得佢，我喺上海出世，佢係我堂表哥嘅同學兼死黨，佢成日有嚟我屋企玩。之後我同媽咪移民咗去加拿大就冇聯絡，呢幾年先見番面。」問到楊恭如是否認識周正毅太太毛玉萍時，她說：「我唔識佢太太，人與人之間要講緣份。」
對於會否避忌以免誤會時，楊恭如提高語調說：「點解要避忌？我哋係親朋戚友，唔係緋聞女友。」楊恭如表示與周正毅相識二十多年，會繼續與他來往，她說：「朋友行街食飯好正常，我哋覺得好無聊，唔會深入研究，香港好多雜誌亂寫嘢。」問到會否向周太解釋，她則說：「冇咁必要，人哋都冇話誤會我。」
至於以十萬元租住半山豪宅一事，楊恭如說：「啲人諗多咗嘢，唔通你懷疑我嘅經濟能力，我住好啲貴啲靚啲舒服啲唔得，我又唔係拎幾千萬出嚟買樓。」
此外，有份出席頒獎典禮的袁詠儀（靚靚），前晚對於與好友楊采妮（Charlie）等一起投資的製作公司「FAE」上月秘密結業一事說：「如果佢哋無良，佢哋可以清盤，但係Charlie同ST（邱韶智）冇咁做。佢哋之前忙去咗德國同內地，所以唔記得供樓，我都試過唔記得交信用卡同電話費啦。我覺得自己好幸運識到楊采妮，我冇畀佢呃過一分一毫。」
採訪：梁錦雯
攝影：黃文成