香港人最有諗頭，連慈善舞會都特別過人，方黃吉雯（小吉）做執行委員嘅「健康快車」，前晚喺灣仔會展就用七十年代做主題搞咗個ball，重搵埋董特首主禮。八方係為食之輩，一入場就見到成枱都係七十年代流行嘅小食，缽仔糕、雞蛋仔……，口水幾乎流到一地都係。
小吉作為搞手，好識做咁帶阿董試吓港式小食，點知阿董唔知係咪上海人，對啲小食冇乜feel，一見到缽仔糕就耍手擰頭：「缽仔糕呀，唔好嘞。」至於雞蛋仔阿董都無興趣。八方心諗，老人家梗係唔鍾意零食，等八方捱義氣幫你清晒佢。
「小甜甜」龔如心就一身中式打扮配玫瑰頭飾出席，提到七十年代，佢話：「我都唔記得啦，嗰時成日跳A-Go-Go舞，𠵱家冇跳好耐囉！」後來工作人員向佢兜售獎券，呢位全港最有錢嘅富婆竟然面都紅晒話：「我𠵱家冇錢，我點會帶錢嚟呢度！」
那邊廂，光華新聞中心前主任江素惠都懷舊一番，佢話七十年代已經好仰慕香港，嗰時香港重係購物天堂。江大姐話自己當年去美國交流後，回台灣時路經香港，之後返到台灣即刻俾人問佢有冇去香港啲百貨公司行一轉。自此之後，江大姐話已經對香港愛得死心塌地，八十年代來港定居，𠵱家已經係三粒星嘅香港居民咁話。
傳真︰2623-9278
電郵︰