鄭伊健走紅後，收入十分可觀，他將大部份收入用來買樓投資，可惜他購入的六間屋，不但沒有升值，反而一度變了負資產，害他有供樓壓力，所以現在伊健提起買樓投資已經怕怕。
伊健說：「以前話有錢買樓就啱，喺自己事業高峯期，我將簽唱片公司攞到嘅第一桶金用嚟買咗六間屋，其中有兩間重係豪宅，結果樓價大跌，我蝕晒嗰千幾萬，有時我覺得上天都幾諷刺，呢頭畀我搵到千幾萬，但嗰頭又一下子畀我蝕晒，不過我只係當買個經歷，因為我重有能力翻身。
「之前有兩間屋我已經賣咗，𠵱家剩番四間屋，一間自住，其他就畀屋企人住。啱啱入娛樂圈嗰陣，我喺無綫一個月只得三千蚊人工，真係冇諗過可以搵到咁多錢，所以雖然投資失利，但我仍然覺得自己好幸運。」
伊健現時住在自置物業匡湖居，與女友梁詠琪為鄰。
他說：「𠵱家銀行息口咁低，供樓的確平過租樓，供匡湖居都係兩萬幾，咁我計過條數先會決定買呢間屋，不過如果再有多餘錢，我會儲起，唔會諗乜嘢投資。」
接觸過的藝人當中，鄭伊健可以說是一個沒有機心、亦沒有野心的藝人，可能就是因為沒野心，容易滿足，總覺得他鬥心不夠，不過他可愛之處就是心地很善良和孝順。希望在他自覺是最低潮的2002年，可以再起風雲。
撰文：陳月媚
攝影：林德雄
協力：戴彩煥、陳慧安
場地提供：博藝會、JustDanceCafe