伊健與GiGi不經不覺已相戀了三年，雖然常會為小問題爭拗，但兩口子的感情始終未變。而自從一系列《古惑仔》電影後，他的事業似乎停滯不前。
伊健說：「我兩個性格好主觀，但你唔好理，我哋走埋一齊都幾年。GiGi因為又出唱片又拍戲，曝光率始終較多，相對之下，外間會覺得我曝光較少。其實唔係唔想出唱片，我簽咗英皇之後，李進好快就離開咗英皇，喺頭一年我都會緊張公司冇幫我出唱片，但𠵱家又覺得係好事，一來個市唔好，如果出咗唱片賣得唔好重衰，我冇後悔簽咗英皇。我都係諗住主力拍戲，唱片可以遲啲再算。
「做咗娛樂圈呢行咁耐，要轉行都難，但我相信自己畀心機去做嘢，機會一定會再嚟。對我嚟講，𠵱家已經係我嘅最低潮，雖然戲重係繼續拍，但票房未算好好。不過我冇疏懶，反而會睇多咗戲同書，又好勤力學國語同歌藝，人生應該有經歷，可能經過呢啲經歷，對我將來做戲可能會有更大幫助。」
以前聽伊健講國語，大家會禁不住笑，但最近他講國語明顯比以前進步，原來其女友GiGi功不可沒。
伊健說：「GiGi係好關心我嘅事業，不過佢教我講國語都教到嘔血，可能我真係冇語言天份啦！其實重有一位老師教我講國語。我唔明點解啲人成日覺得我做嘢冇鬥心，只係掛住玩，我承認玩嗰陣好投入，但我做嘢時，一樣好勤力，不過我唔會見到人就同人講，自己會點勤力。」