十二歲便離開香港往英國讀書的陳嘉蓮（Kathy），成為大學生卻足足等了三十多年，原因是年輕的她，認為讀書沒有真正的價值。
直到今時今日，她擁有自己的人事顧問公司，再以遙距進修的方式，修讀了一個社會科學學士課程，成為大學生後，還是覺得對工作沒有直接的幫助，不過不同的是，今天她認為有些事情不能假手於人，知識便是其中之一。
記者：朱文俊
攝影：陳穎
增值歷程
自小離開香港的Kathy，報讀社會科學，是為了增加對香港及中國的認識。
姓名：陳嘉蓮（Kathy）
職位：人事顧問公司老闆
96年11月至2001年1月：社會科學榮譽學士（香港公開大學）
用一帆風順來形容陳嘉蓮的工作歷程，可說非常恰當，由做銀行到酒店，再到自己開創人事顧問公司，都是年年升職賺錢，亦間接令她認為讀書對工作的幫助不大。她說：「我喺香港暴動（1967年）時候便去了英國讀書，當時英國好自由，好多好玩嘅事情，自然冇心機讀書，但係因為我鍾意睇小說，所以英文一向都好好，當我讀完中學，在那邊住了幾年，然後返回香港工作，由於我嘅英文好，個樣又似讀過吓書，所以一直都升職加薪，完全冇因為冇大學學位而有乜嘢困難，80年代初，我在一間酒店集團做公關部經理，手下起碼管住6、7間酒店，到咗94年，有獵頭公司搵我去一間保險公司做人事部經理，年薪都過一百萬，同年自己更開設人事顧問公司，所以過吓一年過吓又一年，都冇諗過要考番一個學位。
「直到96年左右，眼見當時社會開始轉型，嚟我公司搵工嘅人，好多都係喺自己行業做咗一段長時間，然後突然間俾公司炒咗，之後再搵唔番同樣工作待遇，佢哋大部份都係四、五十歲年紀，除咗本身行業知識，對其他行業差不多一無所知，於是我就諗，我都好快到呢個年紀，如果我繼續咁做落去，會唔會好似佢哋咁呢？於是我就決定重拾書本，再開始我嘅學習生涯。唔係想通過讀書去得到啲乜嘢，而係唔想自己停低再冇進步。」
對於重新投入學習生活，Kathy顯得非常謹慎，所有細節都想得一清二楚，安排得非常妥當。她說：「既然我讀書唔係因為要個Degree嚟升職加薪，咁選科方面就唔使要乜嘢實用價值，最緊要係自己有興趣，所以每次選科前，我都會先去學校圖書館睇過晒啲課本，發覺啱自己讀先會選修，試過有次報咗一科後，第一個Chapter發覺好有趣，但係一到第二個Chapter就發現原來有好多數要計，即時畀多一百蚊學校轉科，做乜要難為自己？
「其次初初讀番書，驚自己冇恆心，於是拉咗兩個朋友陪我讀，結果我就畢業，佢哋都係中途放棄，原因係一個為咗要升職讀書，後來發覺唔會因為讀完書就可以升職；另一個因為想話畀人聽自己有Degree所以去讀書，佢哋讀書都係為咗人哋讀，自然好快就放棄，所以讀書千祈唔好為人哋讀，唔好為咗要升職讀，同埋揀科一定要揀你有能力Pass嘅，唔好明明數學唔掂，就去讀會計師牌，到你死嗰日都未畢到業，人唔使咁樣畀挫敗自己。」
雖然Kathy讀書並不是為了升職加薪，但讀完大學後，她還是覺得有得益。「最開心係識到班同學，同埋可以確定到自己嘅持久力。至於讀書壓力，我本人就真係冇乜，就算係考試溫書，我都係同朋友一邊飲紅酒，一邊討論，冇話特別緊張，鍾意嘅嘢就唔會有壓力，等於你睇緊一本你鍾意嘅小說，會唔會覺得有壓力？」