康妮與左丁山講完長者偶像李香琴、朱維德，又講本地年輕人偶像郭富城、陳慧琳、李克勤等等，佢問左丁山有冇辦法同佢撲飛，星期日晚上到清水灣無綫電視睇郭富城、陳慧琳嘅現場表演，唔係一張飛喎，而係十張八張，畀埋佢啲年輕表弟表妹。左丁山點有辦法搵咁多張飛呀，一於話冇，費事麻煩。
康妮話，郭陳李、王傑、陳文媛、陳小春等偶像，係為「關懷行動籌款」，星期日晚（六月十六日父親節）晚上八時半至十時，現場表演兼向公眾募捐，到時大家可以打電話2111-8348（五十條線）認捐，多多益善，少少無拘。本來有幾百張飛係由無綫派送嘅，但消息傳開後，已立即俾啲fans攞晒，康妮嚟遲半步，已要望門興嘆，故此央求左丁山幫吓手，問吓無綫。左丁山最怕做呢啲嘢，靚女求情都冇得傾。但經康妮一講，先知道啲偶像確係好有號召力，要吸引人睇節目，增加收視率，佢哋好有作用。
亞洲電視似乎冇乜偶像鎮住廣播道，做節目梗係嘥咗力而收唔到理想效果，最近收視率勁跌之餘，又發生股權變動，封小平立即鬆人，報紙話由陳永棋做總裁。肥仔棋做成衣紡織就夠晒叻，做電視管藝員搞節目，掂唔掂呀？睇過先至知，𠵱家唔敢話佢唔得。畢竟成功商人總有佢嘅一套，要畀啲時間佢，今晚嘅時間就係睇「關懷行動籌款」！