狄龍之子譚俊彥（Shaun）曾在加拿大接受教育，思想前衞，不過他跟嚴父狄龍的感情十分要好。阿Shaun日前更與父親一同到又一城的Levis'專門店，親自揀選父親節禮物。
雖然兒子所送的只是一頂牛仔布鴨舌帽，但狄龍卻樂在心頭，馬上戴上這頂愛心鴨舌帽逛街。事後狄龍對記者說：「其實阿Shaun都大個仔啦，我成日都勸佢唔好因為老竇喺呢行有成就，而畀自己太大壓力，做個開心快活人就夠。」
而阿Shaun則笑說：「我阿爸好嚴㗎，記得我四、五歲時，有次阿爸揸車聽新聞，我就係都要聽兒歌嘅錄音帶，我不斷㩒停個收音機，後來返到屋企，我就俾阿爸困咗喺間狗屋度，要同隻大狼狗一齊瞓咗一晚，第日就嚇親發燒咯。」
採訪：朱芷瑩 攝影：黃文成